Pounamu Pounamu - Te reo Maori edition

Witi Ihimaera's first published book - Pounamu Pounamu - translated into te reo Maori. Published in collaboration with Kotahi Rau Pukapuka.

E rima tekau tau ki muri, ka puta mai a 'Pounamu Pounamu' hei kai ma te ao panui reo Pakeha. Ko te whakataunga a nga mana matauranga o Aotearoa o taua wa, he pukapuka tenei ma nga tamariki i nga kura o te motu whanui.

Kua huri te ao, kua hipa te wa, ko tenei a 'Pounamu Pounamu' e horahia nei hei hakari ma te kaipanui reo Maori, ko ia ra pea te mokopuna a te kaipanui reo Pakeha o mua.

Ka pehea te kawe i te wairua o tenei kohinga korero e rangiwhawha nei te panuitia, kia rangona tonutia ai te kounga o te kupu Pakeha? Me kawe tonu i te pukuhohe o He Kemu Kari, i te ngau mamae o Tangi, i te hohonu o te aroha o Te Tamaiti.

Kua whakautua taua karanga e nga kaiwhakawhiti reo Maori tekau ma tahi i noho ra hei pia i Te Panekiretanga o te Reo me nga Kura Reo. He mea homiromiro a ratou whakamaoritanga e te kahui hihira, e Makoha Gardiner ratou ko Pania Papa, ko Heni Jacob, ko Stephanie Tibble. Kei roto nei nga hua o ta nga kahui nei whakaheke tota, e kitea ai, e rangona ai hoki te puawaitanga o te reo Maori me nga reo a-iwi i roto i nga tau.

Kei te tu rangatira tonu nga kupu i rere mai ai i te pene a Witi Ihimaera, nana te huarahi i para hei whai ma te kaituhi kaupapa Maori. Me mihi, ka tika.

Ko Kotahi Rau Pukapuka te waka. Ko te pae tawhiti, kia 100 nga pukapuka reo Maori ka pae ki uta. Ko te whainga, kia puawai te aroha ki te reo ma te rau pukapuka. Tenei matou e pohiri ana i a Penguin Random House hei hoa whakatere, hei hoa whakatutuki i nga wawata o te hunga e ngakaunui ana ki te reo Maori.